Ditg hai stuiu marcadar,
per insumma en vossa stiva astgar entrar.
La torta cun la mascra hai bratau
e miu persunal allas normas dil BAG adattau.

Oh il Corona,
quel nus damogna!
Igl ei bein da fugir
che gl’entir mund uss sto pitir,
pervia d’in miezmiur e miezutschi.
Daco san ils chines buca schar,
da tut la miarda en bucca catschar?
Aschia eis ei buca da smarvigliar
che vinavon pandemias vegn a dar.

Duront corona il Volg haveis susteniu
e tut il pusseivel a casa veis priu.
Pupi da tualetta, fueras e miardas veis magasinau
ed ils regals svidau.
Sco engraziament lu il det amiez mussau
ed il consum dil Rein giuado catschau.

La giuventetgna il vitg ha susteniu
ed als vegls ils giavischs adempliu.
Paun e latg e medicaments,
per quels cun fom ed als dements.
Mo quella glieud fuss da scurlar
che lessen l’UgR clamar,
per cumissiuns giu Trun el Volg schar far.

La Via Sursilvana 56
per enqualin stada il sogn parvis.
La «servierdüsa» Fuffi ina «besabeiz» ha aviert
ed a giuven e vegl dau albiert.

Gie – il corona ha uonn dominau,
bia auter ei buca schabegiau.
Mo giu l’ovra ei vegniu baghegiau
ed in plaz da reciclar formau.
Il Luis Beer dil virus buca ha schau prender,
da diesch ga a di giul «kisi» serender.
Leu el ha surpriu la plema
ed a mintga singul luvrer fatg la gliema.

Has ti rauba veglia da dustar,
buca giu Rueun stoss trottar,
mobein al Marcus telefonar.
Il marcadont da Laus la puorla ha ferdau
ed a Cumpadials igl asen d’aur anflau.
En sia brocki da tuttas antiquitads sas cumprar
e vitier products indigens degustar.

Tier questa strofa il Sogn ha buc saviu setener,
affons pigns fan meglier da las ureglias tener.
Netz Natur per in trest capetel ha procurau
e cun manzegnas la votaziun da catscha tartignau.
Tgi a quels «unterländers» el tschurvi ha tgigiau?
Era ils «welschs» fridas vessen maritau,
cu quella lappadira pil luf han votau.

Si Laus, Campieschas e Marias
da bi clar di va el per las vias.
Videos cun els ins a saviu far,
senza ch’ei vessen schau disturbar.
Avon che zatgei en caussa vegn ad ir,
si dies ad in carstgaun mattei sto seglir,
speronza mo in «unterländer» stuein unfrir.

Forsa fussi da realisar,
la proposta da Paul Accola:
Ord il Nil crocodils pescar
e quels el Lag da Turitg plazzar.

Sontgaclau al Diego less gratular
e per la nova sfida bien success giavischar.
Al Center Puntreis uss di adia,
serenda giu Cuera sco niev capo dalla Lia.
Mo jeu ina tecca stoi tuttina dar,
ir dapli a cuorer, gliez stuesses far,
l’Iris buc l’entira veta sa spitgar.

Sin vias da quartier ins astga ir 50,
mo enqualin sbaglia e va 150.
Al «raser» da Cavivens,
fuss da pitgar ora ils dents.
Tei bugen en cadeina prendess
ed a Cazas davos garters mettess.

Vi Surrein, si Reits, igl ei vegniu scavau,
buc aur – na truffels ei manegiau.
Ils dalla davosa ti mordio han luvrau,
sez lur viadi finanziau
e buc per daners sur «crowdfunding» betlegiau.

La dumengia vi Vitg elecziuns ha dau,
gerau denton negin han anflau.
Il club da bigliard siu cletg ha empruau,
quei denton buca ha funcziunau.
Il Sogn a vus mo sa recumandar,
dad ina vusch alla giuventetgna dar:
uss pil Flurin stueis ir a votar!

President Armin uonn in pulit ei staus
e d’in lavatgau mitschaus.
Persuenter ina buna novitad has purtau:
el 2019 dapli naschientschas che mortoris ha dau.
Schizun famiglias giuvnas casa han cumprau
ed aschia lur igniv a Rabius creau.

Il niev president dils amis ei Biden Joe,
tuts van d‘accord, sulet Donald di No.
Mo atgnamein vess Trump gie gudignau,
sch‘ins vess sin el tedlau,
e buca tuttas vuschs dumbrau.

La cumissiun da baghegiar gleiti sto,
ina plazza cumpleina mo pil Gion scriver o.
Si mises va vinavon
sco mintg’onn.
Per lubientscha has dumandau?
Tut emblidau…
o ti hazer cucu!
Si Chistrisch ina garascha pil vischin has astgau construir,
il curtin denton auters han stuiu finir.
Per la Repower in sfoss stuiu cavar
e la crappa encunter la casa dil Linus schau ruclar.
Talas lavurs en futur buca pli surpren,
has bein avunda da far sin tiu agen terren!
Cun entscheiver pér da miezdi,
vegns mai da finir.

Has la tgagia da studegiar,
lu vas intec a demonstrar.
Sche bu cun la Greta,
lu halt cun ina autra buobetta.
Tgei ei quei per in sedepurtar?
Cun la torta fuss da dar.

Ils dalla Péra,
fan paupra tschera.
Il runal ei periclitaus
e sto vegnir renovaus.
Aschia miez milliun ins sto investar
per che Marcel vinavon la cuorsa sa gudignar.

Al Sogn giun plaun la missiala ei curdada,
cu el ha viu quella surbaghegiada.
Vi Sumvitg in quart milliun han satrau
e la scola cun in tetg d’aur ornau.
Sur dalla bellezia ins sa discussiunar,
mo zatgei pli perdert cun tons daners vess duiu far.

Igl ei sco da mulscher miurs,
cun l’aua da ruina a Rabius.
Per ils da Vitg buentar,
milliuns astga custar.
Segir pli bienmarcau fuss iu da far
e zatgei pauc or il Gir investar.

Papa Francestg ha fatg ina gliesta
ch’ils canonis hagien la survesta.
Nuot ha gidau,
els per negin han votau.
Enstagl el 21avel tschentaner arrivar
il pli conservativ spiritual van a tschercar.
La cuort episcopala a Cuera,
al Sogn mo pli fa la fuera.

Martin, Martin aunc dus onns stoss spitgar,
avon ch il Sogn avon tei en schanuglias vegn a star.
Gleiti il pli ault svizzer astgas senumnar
ed a Berna praulas per romontsch raquintar.

Sontgaclau lai engraziar
ch’el uonn veis schau entrar.
Lein sperar che tuts stettien sauns
e l’auter onn in a l’auter savein dar ils mauns.

Avon che ir,
vus less benedir.
In tec tissi ell’aria sprizzar
e vus desinfectar.

Per nus buc aunc la Péra stuein schar ir,
jeu il suandont vi dir:

Ina buna mana surdar,
in toc suga cumprar
ed il runal spindrar.

Amen.