oremus 2018

Uonn cun retard sun arrivaus,
Gl’oremus er’aunc buc pinaus.
Mo uss las ureglias gizzei,
vos puccaus tedlei,
e semigliurei!
Las cornas allas vaccas buca haveis pudiu quir,
Las vossas vegn uss era a scursanir,
Quei a mi carti.

Quest mund ei disturbaus,
na – il carstgaun ei buca cavigliaus.
Dapertut vegn empruau da cuglienar,
e mo pigl agen sac mirar.
Gnanc alla posta pli sas fidar.
E certs nuot pli perdert han da far,
che surda vaccas cun ni senza corna politisar.
Nua che quei meina,
S. Clau savess scurlar da quella rateina.

Suenter diesch onns Sur Benny nus ha bandunau,
el anavos en sia patria ei ha menau.
La pleiv el denton buc el caco ha schau
e pil successur grad sez ha mirau.
A Sur Saji in cordial beinvegni lein far,
lein mo sperar ch’el las fumitgasas en ruaus pon schar.

La primavera Otto e Luis han clamau,
cun giuven e vegl giul Kieswerk grillau.
Leu han els lu menziunau,
che la firma avunda ditg han menau.
Uss’il tgamun sin tschun partiu si,
giuvnas fatschas ins ves’uss dapli.
-
Quell’ocurenza era dalla PCD ei vegnida nezegiada,
Aschia giul kisi in’armada politichers ei arrivada.
Ils potenzials candidats in ni l’auter tgil han litgau,
E sin vuschs tier proximas elecziuns sperau.

Suenter ina massa onns igl ei puspei reussiu,
in representant da nies vitg el cussegl grond plaz ha priu.
Buca Pablo mobein Diego ei giu Cuera ha tratg
ina pintga fiasteta sil’elecziun lu ha fatg.
Sontgaclau per ils da Rabius mo sa sperar,
ch’el alla regiun niev slonsch possi dar.

Entuorn la scola malruasseivel traso,
Il proxim meinascola dil consorzi ius o(ra).
Tgi sa sch’il niev tip alla testa,
Intec pli ditg al tgamun ussa resta.
Ni forsa era el in chaos creescha?
l’instrucziun da scola sut daquels teaters mo pitescha.

Per ina praula da stad tuts eran pinai,
Mo egl otgavel final gia ord il turnier ein curdai.
Ils jungs da Petkovic nus bein han trumpau,
Silmeins il tschess dall’albania en chista han mussau.
Era a Rabius ella Greina ils polischs vein teniu,
Il public viewing a biars ha plaschiu.
Enstagl dil success enqual zaghrender havein lagutiu.

Il Martin puspei inaga en patria ei turnaus,
e cun Victor Giaccobo tras vischnaunca carraus.
Ella Greina da Oberländers e lufs han tschintschau,
Da Martin sco cusseglier federal in spé discutau.
Il Valentin da Surrein tras la sera menau
cun els treis – bein legher ei stau.

Andreas e Barbara ina nova ära han lantschau,
l’ustria Greina cumpletamein renovau
ed ina nova matt’engaschau.
Full house quasi mintgadi -
e schizun puncts da Gault Milleau – o con bi.
La sala denton els lessan vender,
D’anflar in intressent – gliez vegn mattei mender.

Haveis vus anflau da maridar,
ed encuris ina sala per festivar?
Lu stueis festginar,
Ni l’entira sala cumprar.
Las tualettas stueis sanar,
Pertgei in pissoir sec ruina fa.
Pia pulit bia daners d’investar,
Sontgaclau non sa,
Tgi che schi bia zaster ha?

Fors’igl ei meglier da cuortas far,
E gl’exempel dalla fabrica dils Lutz suandar.
Leu uss ils davos fastitgs han curclau,
e la surbaghegiada dil signur Löser satrau,
gnanc la bargia dil Silvio han schau.
Igl ei denton da deplorar,
che tut ins giu ha stuiu scarpar
per suenter nuot baghegiar.
Gronda bahautscha
ed empau tuffiern ella caultscha.
Giu Igniu persuenter igl ei vegniu baghegiau,
buc il lag, na, la tschuetta ei maniau.
Ord las neblas ina disco ei vegniu tschentau
o Stucki, tgei has pomai ponderau?!
Sontgaclau denton buc adina less reclamar,
All’avertura dus, treis pierlis vegn a chipar,
Per l’auter di cun hangover sedestadar.

Aurax e lu Alpiq,
ed ussa para Bougues (Buik),
daco midar il num traso,
pil Sogn rest’ei EWBO.

S.Clau ditg haveva tertgau
ch’ol Gir uss era traffic grev vegn manau,
Perquei ch’ils Bieler ina seiv sil parcadi han montau.
Mo il motiv per il claus,
Sco Wende- e Parkplatz il parcadi vegneva maltractaus.
Pia ils clients dalla Sunitha,
per semanar ston uss ir en tier la Rita.

Giu Igniu – o tgei tufferia,
Ha bein barschau la deponia.
Pastg e caglias en fiug e flomma,
Il fem serendius tochen giu sontg’Onna.

Per posta d’enqual gnaha,
Empau libertad han stuiu strihar,
Giu igniu mo tenor igl urari ch’ ei vegn a dar
Tiu cagliom sin deponia sas schmanar
Con ureidis ins sto vegni
Per zatgei aschi sempel buc capir,
Il pastg d’ina vart, las caglias da l’auter maun
E negin rumien s’auda leu giun plaun.

Vul ti guder in cocktail cun aua da ruina,
Stos i ol Gir ni Tschuppina.
Leu daquella ghela vegn traso
Sche vul sin schubra spitgar, lu schigias ora
Fuss uras da zatgei far
E buc mo vi vitg novs reservuars baghegiar.

Il chor d’affons sumvitg 2200 francs ei vid rimnar,
Ed aschia novs t-shirts vulan cumprar.
In crowdfounding ozildi per tutta miarda vegn fatg,
…mo sche tut ils commembers ina da vegn el pot vessan tratg,
Gia novs t-shirts vessan saviu squitschar,
Ed buc ina nova pagina d’internet giu da crear.

Mo ch’ei va aunc bia pli tup muossa Corsin T. da Trun, haveis udiu,
Quei lappi che el falliu letg cun 3 promillas ha durmiu.
Enstagl da la glisch ord ils egls seturpiar,
El era daners egl internet ei vi rimnar.

Sontgaclau als da vitg less gratular,
Sco laics in tal project ei buc sempel far.
il film Acta 44 alla populaziun han presentau,
E cun scenas d’uiara naturalmein buc han spargnau.
Cun in Oscar il reschissur Flavian han tertgau undrar
e si’amitga buca pli tup havess saviu far.

Suenter quella stad da calira
Era Sontga Clau ei en pitgira.
Ils davos daguots ord la cistiarna hai stuiu unfrir,
Per igl asen buca schar murir.
Aua stoi spargnar
Ed aschia la benedicziun mo da schétg sai dar.

Per che l’auter onn vus sai bugnar,
L’aua da ruina stueis filtrar
e tualetta schétga montar.

Amen!