Oremus 2016

Ditg vai stuiu studegiar
Sche insumma tochen giu cheu duess trottar
Sontgaclau uonn nuot leva dir
Mo vus miu oremus leis udir

Si Campieschas vai mirau oragiu
Dus tetgs l’egliada han quasi fendiu
Tier la baselgia ils egliers da sulegl stoss montar
E sil tetg da Dr. Candinas igl eternit alv sco neiv lai ins tut schelar
Luis Beer ha pudiu tertgar
cu schizun la baselgia il tetg lai renovar,
lu forsa era jeu patratgs duess far
schiglioc stoi buca smarvegliar
sche in di cun sadialas l’aua ord casa stoi purtar

Ils Bearths il tgamun han midau
Uss igl Adrian la suppia biro ha occupau
La tschaghegna demontau
E dapli luvrers engaschau

La Musica Surrein-Rabius president e dirigent strusch d’anflar
Il post da president uss en dus astgan occupar
Mo la bitgetta aunc adina negin vul muentar
Vid la speronza ei buc duei muncar
Tgi sa forsa en questa stiva dirigent e musicants ein da cattar

Il Salun Martin la Tamara ha surpriu
E gia enqual bera ha tundiu
Ella ha da far ti mordio
E la miaula fa ir traso

Suenter sur decenis sco tiers el stgir haver viviu
Ils da Surrein han tuttina decidiu
Da cazzolas da via montar.
Ed il vitg en in niev glanz schar splendurar
Igl ei buc da sminar
Ch’igl um ner anavos vegn a turnar

Ina miracla ei schabegiada
La via da Marias ei r-u-g-a-l-a-d-a
Na, bu cun dapli bots dil stradalesser
Da Profis, sco gia daditg vess giu dad esser
Ils dalla via da Surrein las petgas san allontanar
E bu pli dil traffic grev tugnar
Il Carli uss da leu giu sa filar
per als pluscheins la bunanotg saver dar

Per las vias novs nums hai dau
Vid mintga fassada ina numbra blaua montau
Aunc stoss sendisa,
sche ti la dretga casa vuls anflar
Uss il DHL pli spert nossa casta da brevs sa emplenir
Cun tut quei plunder che ord igl internet scheis vegnir

En quei sac
Vegn dil tgaun il cac
Quei säckli el robidog ei da better
E buc agl ur dalla via metter
Il proxim che traplel che tals delics fa
Cul cac dil tgaun, la sava digl esch casa vegn a tartignar

Enstagl dad adina la giuventetgna criticar
Less Sontgaclau per inaga tala ludar
Suenter che biars la camischa digl Ursin gia havevan emblidau
Ha l’ugr puspei alla sera familiara clamau
L’uniun da dunnas ha gidau
il Gion risotto cuschinau
Quei nuota aschi da piertg ei gartegiau
Per damagliar e sust ei vegniu procurau
Ina tafra blacha sul plaz scola rentau
e suten lu grillau

Oh tgei Kilbi quei ei puspei stau
Tochen ch’igl ei finalmein gartegiau
E la vischnaunca ha giu la capientscha
Per dar als giuvenils la lubientscha
Brevs vi e brevs neu per astgar festivar
mo tgei ch’era il problem, …sontgaclau non sa….
Seigi sco ei vegli, la fiasta han fatg
Mo è sut quei Kilbi in streh uss han tratg
Pertgei sche tut quei ch’els fan ei falliu
L’auter onn giu Trun per la lubientscha vegn iu

Sontgaclau era vid radio tedlar
E tuttenina la Gabi ha calau da tschintschar
Quei hutsch sin DAB+ hai stuiu midar
Schiglioc sez havess stuiu cantar

L’America ha elegiu
Donald Duck president ei vegniu
Per Clinton
Ei stau nuot a Wahsington
Putin vegn a legrar
Cun Donald sa daners lavar

Danovamein giu Trun ei d’anflar
L’O-l-g-a, —- savens vid fimar
Pli baul aunc a Rabius l’ustria staziun menava
E cun cordialitad e plascher bugen spargnava
Ella tuttina siu num ella Cadi ha fatg
Ussa a quels da Trun il daner ord sac vegn tratg

Las uras d’aua dapertut han montau
Naven da 2017 mintga daguot vegn quintau
El business da Sontgaclau ins ha reagau
E gia uonn per l’aua benedida 50rp. vegn incassau
Sulet ol Gir e Tschuppina l’aua vegn a regalar
Quels paupers giavels cun aua da ruina ston selavar
Ohh… Gion, cheu zatgei stoss far

Gronda canera ei ha dau
Culs altars en baselgia han montau
Mo uss tut ei sequietau
Armin, l’autra ga
Il pievel ad uras stoss informar
E buc tut discus vuler far.

Pli bi ch’in pigniel giu Glion cumprar
Ei bein ina scua tiel Sogn empustar
Sin giavisch, mes fumegls van per tut
In cun dus spitgs, in uliv ni in blut
Scrivi cheu sil cedel il num e l’altezia
Sche leis uonn da Nadal in pigniel da bellezia
Era sche leis in pigniel gia ornau
Ella Val Mulinaun gia in hai montau

Ohh… La tgagia veis saviu far
cul Parc Adula

A radunonza dil parc oh tgei rueida
Igl Armin gleiti perdeva la controlla en quella baheida
Il Sigis in referat ha teniu
Ed il Leo sur da cunfins d’anno cluntga referiu
Schizun sur da ghela si alp glivers tedlar vein stuiu
Sulet il Rico nuot da dir ha giu

O tgei debatta dil tenti quei ei stau
Si el Peter Kaiser bia perdert buc ei vegniu tschintschau
Il Tomaschett aunc purtau arguments capeivels
Per il mutg da Vrin ils tals denton buca stai valeivels
Pli bugen cumparegliar meila cun nuschs
A quei purtau bia cuntervuschs???
Ed era il Leo buca saviu schar star
Da surda tgei che libertad ei filosofar

Vossas lavazzas vid vies tgau gizzei
E quella ga mo sin Sontgaclau tedlei
In na ell‘urna veis smaccau
Donn. Ils fumegls il label gia sil satget vevan taccau
Di na e tugnar, mintgin che sa far
Lein mirar tgei ideas ch’ils adversaris vegnan a purtar
Al Blablo ed al Leo spezial sin la detta vegn a mirar
Fuss neras uras da ord la sien d’unviern sedestadar
E pil futur mirar.

Ursin Bearth profils veva tschentau
Denton nuot baghegiau
Forsa uss animals vul acquistar
Siu project sin agroturissem midar
ed in agen parc crear

A Salischinas in project ei vegnius lantschaus
In lag, tratga da péschs, camping e sappi Dieus tut tgei malruaus
Il meglier fuss il lag dil Giachen renovar
Il lag o Plaun Petschen schubergiar
Cun voluntaris las plazzas da giugs rugalar
E tier novas ideas culs peis giun plaun star
Schiglioc en entgins onns ina punt naven da Tschuppina vi Encarden vulan baghegiar

L’ustria Surselva ha serrau
Il Kurt
ha priu siu gurt
ed ei staus furt
FINIU

Per Vus da Trumps, Blablos ed auters populists spindrar
Uss la Sontga Crusch stueis far
E mia aua en fatscha schar sprizzar

Amen