Sin iniziativa dil davos capitani da mats da Rabius (CdmR) Linus Maissen, 46, e cun sustegn dalla davos presidenta dalla Uniun da mattauns Rabius (UdmR) ei la Uniun da giuventetgna Rabius (UgR) vegnida fundada egl onn 1970. Linus Maissen, 46, ei lu era gest staus igl emprem capitani/president dalla nova e fundada uniun.

Las usonzas da pli baul ein per part vegnidas mantenidas e per part svanidas. Entginas autras ein vegnidas vidlunder sco per ex. far cavals avon la fiasta da Sontgilcrest. Per quella fiasta vegnan ils novs canditats e las novas canditatas pri si ell’uniun suenter haver terminau las scolas primaras e superiuras. Il di avon las paradas vegneva empustau la negla tier ina giuvna e quei deva la pusseivladad da gest ira a mattauns e per in bien puschegn. Oz ei quei plitost la caussa che vegn fatga tier la mumma. La veta d’affonza ei terminada ed ina nova epoca dalla veta entscheiva.

Quei ch’ei era vegniu vitier ch’era buca pli baul ei l’organisaziun d’ina sentupada da giuventetgna da lunsch e da maneivel en casa da scola cul num « Lady’s night ». Sper far parada tier las fiastas ecclesiasticas ein aunc autras usonza vegnidas mantenidas sco per exempel, il far Sontgaclau, ira per pigniel da Nadal, excursiuns e viadis pli gronds sco era schubergiar pastiras ed agid vid plontaziun d’uaul. (Dapli legia l’historia dalla CdmR.) (Text da Linus Maissen, 2020).

„Nossa cumpignia sa festivar uon il giubileum de 50 onns suverenitad. Igl onn 1901 ei stau la separaziun della pleiv de Rabius. Dapi lu ei nossa pleiv stada independenta della capitalla ed aschia da gliez anno era nossa giuventetgna. Cun mauns pli u meins vids han ils mats da lezas uras scafiu cun bien spért la cumpignia da mats. Quei bien spert ei adina vegnius cultivaus en las retschas de nos mats, aschia che nus astgein mirar anavos sin in fritgeivel miez tschentener.“

La cumpignia da mats exista pia dapi 1901. Tochen igl onn 1939 senumnava quella aunc „societad de giuvens Rabius.“ Naven da 1940 ei l’uniun protocollada cun „Compagnia de mats de Rabius.“ Sper la cumpignia da mats existeva aunc „l’uniun de matauns a Rabius.“ Egl onn 1970 vegnan las duas uniuns fusiunadas sill’iniziativa dil capitani da mats Linus Maissen. Il resultat ei staus l’uniun da giuventetgna ch’exista aunc oz.

Survesta dils capitanis, dils presidents e dallas presidentas: