Oremus 2015
Sontgaclau uonn sin viadi tut tup ha mirau,
Rabius prosperescha – ei vegn baghegiau.
Ussa tedlei tgei che a Vus vi annunziar,
Vos patratgs sez stueis far.
A Rabius ina bun’olma en pensiun serrenda,
La forsch vid la guotta el penda.
Il Martin coiffeur per in e scadin peda ha priu,
Ed als clients finadin giavisch adempliu.
Sur 4 decennis el la fatschenta ha menau,
E per bialas frisuras el vitg procurau.
Sontgaclau denton a Vus po annunziar
Il salun sut il tgamun dad ina dunna vinavon vegn a dar
Vi Surrein provisoricamein cazzolas han montau,
E differents prototips sper via tschentau.
Minimum in e sisonta (1.60) ins sto esser,
Per la glisch suenter mesanotg far crescher.
Ussa ils da Surrein è la notg san contemplar,
Nua ch’il dutg havess giu da flessegiar.
Suenter discussiuns la vischnaunca la decisiun ha priu,
Amiez la via dalla staziun ina taffra barriera hera ha stuiu.
Uss è ils rasers entuorn ston carrar,
E negin temps pli san spargnar.
Igl Ursin la caschun dil ruaus ha priu,
Ed ils profils pigl ualer construiu.
Il Diego nova plazza ha vuliu,
La casa da vegls si Mustér ha surpriu.
Siu vischin il Ralf Cook buc ditg ha teniu o,
Veva el da far a casa ti mordio:
Il curtin cun caglias, plontas, fueras e miardas ha ornau,
Da far tarmagls sil pastget a quels giusut scumandau.
Igl ei bein da bargir,
Tgei ch’ils Grischunèrs laian selubir:
La Blocher el Cussegl naziunal ei vegnid’elegida,
Schegie ch’ella giu Turitg viva.
Las stgellas havessan giu da bransinar,
E tuts quei num giud la gliesta strihar,
Mo ohaaaaaaaaaaa – uss ella giu Berna la tgagia sa far.
Ins mo sa sperar ch’il Marin ella empau po frenar
E per nies cantun mirar.
Il Curdin Maissen in niev auto ha cumprau,
In Tesla blau si Castrisch ei ha dau.
Nuot pli cun chista mirar, radio tedlar e natels cargar,
L’electricitad ussa pil niev auto ston druvrar.
Ei vegn mordio scavau e betonau,
Ina nova punt ella Val Mulinaun creau,
Suenter ina liunga grada ei d’anflar,
Nua ch’ins cun 200 vi Vitg sa carrar
Aschia buc mo tier la stalla dil Paul Fry rasers sas pigliar.
La Via da Marias in tema ei puspei,
Principal ch’il traffic buc avon mia casa ei.
Il cantun ina proposta ussa presenta
Ed ils dil Fraissen vilenta.
Buc mo il Mognetti baghegia tudi.
Il Gion Tuor fa aunc pli da garamadi.
Si Tscheps el tut empaglia ha scavau,
Tochen ch’il baustop el ha frenau.
La vischnaunca plans per ina tegia en Val Tenigia ha presentau,
Denton buc cun il Sigis quintau.
Tal en tutta fuorma la proposta ha criticau,
E la bucca sur dils purs dau.
Ad el ina plazza ella cumissiun da baghegiar ei vegniu offeriu,
Quei el denton buc encounter ha priu.
Bia bahaultscha –
Mo pauc ella caultscha.
Habitaziuns cun preferenza per amaturs d’iert e curtin era scret o
Si Caho.
Sontgaclau ina tala vess vuliu,
Sche mandarinas e spagnolettis si leu vess carschiu.
A Caho tuttina igl asen magari jeu freinel,
E las miardas el Moloc schmeinel.
Il Parc Adula per discuors procura.
Dat quei forsa ina dictatura?
Pil parc hazra reclama vegn fatg,
E nos danners da taglia cun pala ord finiastra tratg.
Sche vul el parc viandar,
Il tgaun a casa stoss schar.
Per la libertad dils tgauns spindrar,
Stueis bein ponderar, tgei votar.
La giuventetgna da Rabius puspei ina fiasta ha organisau,
Sut il motto Whiteblue la glieud ha clamau.
Mo certins han buca saviu sco sedepurtar,
Ed il container dils Beers el dutg han tertgau carrar.
Zatgei denton a Vus sai dir,
La fiasta ei gartegiada sco il punct sigl i.
Rabius ina nova pedella ha survegniu,
Ina da Rueras han priu.
In da Rabius era bugen la scola havess schubergiau,
Tal denton ins ha buc risguardau.
La claustra da Mustèr nuot pli perdert sa far,
Che scolars ord la China importar.
Sche quei il turissem lai influenzar,
Ed ils indigens impressiunar – Sontgaclau non sa.
Negin pli pastget po segar,
Dapertut roboters ein d’anflar.
Era igl Otto in tal vehichel ha cumprau,
Forsa proximamein cun il Luis avon casa golf vegn dau.
La fatschenta Daniel Maissen 20 onns a festivau,
Ed in di plein program organisau.
Il volg da Surrein l’ustria ha menau,
Ed ils daners dil Rein giu lavau.
Sontgaclau vess gleiti emblidau,
Dad a Nico Mognetti haver gratulau.
Grond success cun karate el ha giu,
E la medaglia da bronz contonschiu.
Mi’aua benedida uonn aunc gratuit a Vus vi dar,
Il gerau Giusep aunc buc miu dumbrader ha schau installar.
Perquei vus attents vi far,
Dad ussa buca vuler sezuppar,
Mobein dalla davosa aua benedida gratuita – profitar.
Per ch’il prér buc messa cun pellerina sto far,
Ina buna mana alla pleiv stoss dar,
Per che sappien il tetg renovar,
E la baselgia el vitg salvar.
AMEN