Finalmein Sontgaclau en stiva caulda arrivaus
Suenter in liung viadi senza paus’ e ruaus.
Sin la porta alpina spetgel vess
Per lu spargnar solas da calzers.
Bugen ina pizza avon aunc vess magliau
Denton nies pizzaiolo Giocondo nus ha bandunau
Il maletg dil Giachen hani bandischau
L’ Olga igl agen art vid la preit ha enguttau
Uss tier l’ustiera savein seser en stiva
E cun Rinaldo e Bizini far viva
Si Sedrun cun wellness han fatg furora
Ferton si Chistrisch in bogn aviert vegn cavaus ora
Il Curdin sco meinagestiun figurescha
E caubogn Bizini il ruscher demonstrescha
La Carlina sin ina nova Beach Bar speculescha
Ed il Maurus siu curtin cun sacs da sablun emplenescha
Igl excavatur pil bogn ei gia si Chistrisch, maximal
Reto nezegia quei optimal
In tarment casament el baghegia
Cun ina finiastra ord la quala el vi sil bogn laghegia
Sontgaclau era in cumpliment sto far
Gl’emprem trutg da détgas, Sumvitg turissem ei vegnius da realisar
Savens sco aunc mai, il Willi da Sumvitg a Rabius camina
ed aschia ins po tertgar ch’el il proxim trutg sin quella ruta smina
www.surselva.com da Cahô a Cavivens ha bardigliau
L’adressa els han denton buc midau
Enstagl ch’ei vegn Tschutschitsu, Suzuki e Kamasutra trenau
El clavau vid ils computers vegn mulau
Il Silvio cun siu sport harregia tuttina
Sin la homepage el fa smanis plein rutina
Il Runal Rabius alla radunonza generala ha clamau
E per la tiarza ga il futur dil runal tractandau
Giuvs si, giuvs giu, giuvs vi e neu
Quei gida negin, las cefras cotschnas ein cheu
Tiels Lutz’s experientschas en liquidar il Franco ha saviu rimnar
Per uss il runal beinspert saver ingantar
e la tegia cun l’Annamaria da vender empruar
La Cababe adina puspei ad ina fiast’envida
Ed ils hosps spetga in’interessanta purschida
Quei ch’ei pils ins ina fiasta, ei per auters mulesta
Tier talas fiastas ils vischins han che tiba la testa.
Suenter biars onns ella bassa ver viviu,
Ha il Bizini encarschadetgna per ils da Rabius sentiu.
Tgisà sch’el ha speculau,
Ch’il pier seigi si cheu pli bienmarcau?
Il Beer il Carigiet ha magliau
Ed aschia la plazza da golf a Breil installau
Luis e Romy buc pli a Selva ston carrar
In agen plaz han astgau crear
Persuenter il Murer en vischnaunca ils prezis fa empaglia
E presta ina lavur da pauca vaglia
Las femnas dil vitg in niev trend han anflau
Ed uss cun festa per las vias entuorn vegn cavalcau.
Per nies plevon fuss quella nova moda,
Ina bia memia strentga methoda.
El ei sedecidius da magliar mo schambun ed ananas,
Ed aschia bunamein las caultschas ha piars!
Tema e sgarschur han surpriu il davos temps
Ils habitonts sper la via da Cavivens,
ei han temiu che l’uiara seigi rutta ô
e ch’ils panzers dall’armada vegnien da via viado.
O giuvens, montei inaga in sbuff,
Schiglioc caschuneis vus aunc bia pli grond puff!
Percletg Sontgaclau Radio e Televisiun Romontscha ha installau
Ed aschia las pli brisantas novas dalla vischnaunca persequitau.
Ord la via da velos giul kiswerk in’autostrada han vuliu baghegiar
E cuort temps suenter pervia dils verds puspei l’ogna stuiu reanimar.
Dalla societad da musica tgei salat’han pustraccau
Igl emprem la musica bunamein per miert declarau
E lu tuttina culs da Sumvitg da collaborar discutau
O tgei surpresa, lezs han fatg il tgau stinau
La finala ils da Rabius cun quater da Sumvitg ina buna music’han creau.
Tgisà tgi che tut quellas informaziuns tochen giu Cuera ha purtau?
Sontgaclau per oz il siu ha fatg.
Gronds e pigns fagei pulit e dei adatg.
Uss jeu vus benedeschel
E per in onn bugen ni nuidis queschel.
Rabiusarum, Rabiusorum
Per star senza grippa utschellorum
Prendi tamiflorum.
Per omnia secula, seculorum.
AMEN